न्यूज सम्वाददाता
१६ कात्तिक, टीकापुर
भोट माग्न घरमै आएका नवलपरासी–२ नेपाली कांग्रेसबाट प्रतिनिधिसभा सदस्यका उम्मेदवार देवेन्द्रराज कँडेललाई रामग्राम नगरपालिका–१४ को ऐंचावलका मतदाताले सोधेः अब मल पाइन्छ ?
उम्मेदवार कँडेलले आश्वासन दिए, ‘पहिलाभन्दा मलका लागि अहिले सहज बन्दै गएको छ । फास्ट ट्रयाकबाट मल ल्याउन टेण्डर भइसकेको छ । अब धेरै समस्या झेल्नुपर्दैन ।’
कँडेलसँग मात्र होइन, एमालेका दीपेन्द्र अधिकारी र राप्रपाका धुर्वबहादुर प्रधानसँग पनि मतदाताले खेतको धान देखाएर उत्पादन घटेको भन्दै मलकै बारेमा प्रश्न गरेका छन् ।
यो क्षेत्रमा १० राजनीतिक दलका र ८ जना स्वतन्त्र उम्मेदवार चुनावी मैदानमा छन् । भोट माग्न पुगेका हरेक उम्मेदवारहरुसँग मतदाताले पहिला आफूहरुलाई मल र जग्गाको लालपूर्जा दिने प्रतिबद्धता जनाउनुपर्ने शर्त राखेका छन् ।
यो निर्वाचन क्षेत्रलाई पहाड र तराईको भूभागले जोडेको छ । सुनवल र रामग्राम नगरपालिका तथा पाल्हीनन्दन र सरावल गाउँपालिकाको ३ वटा वडा पर्ने यस क्षेत्रको तराई क्षेत्रका करिब ८० प्रतिशत किसान कृषिमा आश्रित छन् ।
राजमार्गदेखि दक्षिणतर्फका किसानलाई मलको समस्या छ भने राजमार्ग आसपासका बासिन्दाको लालपूर्जाको ।
नवलपरासीमा ४० हजार भन्दा बढी अव्यवस्थित र सुकुम्बासी भूमिहीन छन् । जसमा सुनवल नगरपालिकामा सबैभन्दा बढी यो समस्या छ ।
कँडेलले भूमिहीन सुकुम्बासी तथा अव्यवस्थित बसोबासीको समस्या समाधान गर्न सरकारले गठन गरेको आयोगले हाल निर्वाचन आचार संहिता लागेकाले काम गर्न नपाएको बताए । उनले चुनावपछि समस्या समाधान हुने आश्वासन दिए ।
एमाले जिल्ला अध्यक्षसमेत रहेका उम्मेदवार अधिकारी र राप्रपाका केन्द्रीय उपाध्यक्ष एंव पूर्वआइजीपीसमेत रहेका प्रधानले पनि किसानहरुको मल र सुकुम्बासीहरुको पुर्जाका लागि आफूहरुले यसअघि पहल गरेको भन्दै चुनावपछि पनि प्रमुखताका साथ समाधान गर्ने प्रतिबद्धता जनाइरहेका छन् ।
मतदाताले सडक, विद्युतलगायतका काम प्रदेश र स्थानीय सरकारबाट हुन थालेको भन्दै रोजगारी सिर्जना, प्राविधिक शिक्षा, सुविधा सम्पन्न अस्पताल निर्माणलगायतका समस्या सम्बोधन गर्न उम्मेदवारलाई आग्रह गरेका छन् ।
उम्मेदवारहरुले भने पूर्वाधार, सडक निर्माण र विद्युत आदि विषयलाई प्राथमिकतामा राखेका छन् ।
