न्यूज सम्बाददाता
टीकापुर, १४ पौष
कैलालीको टीकापुर नगरपालिका वडा नं.–२ सीतापुरस्थित जनजागृति माध्यमिक विद्यालयको विहीवार सम्पन्न भेलाले विद्यालय व्यवस्थापन समिति र शिक्षक अभिभावक संघ गठन गरेको छ ।
उक्त विद्यालयको व्यवस्थापन समिति अध्यक्षमा दीपक चौधरी सर्वसम्मत चयन भएका छन् ।
टीकापुर नगरपालिका वडा नं.–२ का वडाध्यक्ष समेत रहेका चौधरीलाई विहीवार सम्पन्न अभिभावक भेलापछि बसेको विद्यालय व्यस्थापन समितिका सदस्यहरूको बैठकले आगामी तीन वर्षका लागि व्यवस्थापन समिति अध्यक्षमा चयन गरेको हो ।
त्यस अघि भेलाले अभिभावकहरू मध्येबाट मानबहादुर शाही, माघुराम चौधरी, निमा थारू र गङ्गा ठकुल्लालाई व्यवस्थापन समिति सदस्यमा चयन गरेको थियो ।
त्यस्तै शिक्षक प्रतिनिधिका रूपमा पद्मिनी थापा र सदस्य सचिवमा प्रधानाध्यापक मुक्तिप्रसाद भण्डारीसहितको बैठकले धनञ्जय रिमाल र चन्द्रमाया देवकोटालाई सदस्यमा मनोनित गरेको छ ।
सोही भेलाले कृष्णबहादुर कठायतको अध्यक्षतामा ११ सदस्यीय शिक्षक अभिभावक संघ समेत चयन गरेको छ ।
अभिभावक संघका अन्य सदस्यहरूमा सन्तु थापा, कृष्णा उपाध्याय, समिर चौधरी, ललिता साउँद, प्रतिमा लुहार, नृपबहादुर बिष्ट, बीरेन्द्र चौधरी, शिक्षक प्रतिनिधि उर्मिला रावल, विद्यालय व्यवस्थापन समिति अध्यक्ष र सदस्य सचिवमा प्रधानाध्यापक भण्डारी रहेका छन् ।
शिक्षक अभिभावक संघका अध्यक्ष तीर्थबहादुर चौधरीको सभापतित्वमा आयोजित उक्त भेलाका प्रमुख अतिथि टीकापुर नगरपालिका शिक्षा शाखा अधिकृत नरेश अवस्थी, विशिष्ट अतिथिद्वय विद्यालय व्यवस्थापन समितिका संस्थापक अध्यक्ष नरबहादुर रावल र वडा नं.–२ का वडाध्यक्ष दीपक चौधरीले विद्यालयको आन्तरिक र वाह्य वातावरण सुधार्दै शैक्षिक स्तर अभिवृद्धिका लागि अभिभावकवर्गको थप क्रियाशीलता, शिक्षकवर्गको सक्रियता र विद्यार्थीको उत्सकुता अपरिहार्य भएकोमा जोड दिएका थिए ।
